السلام عليكم يا صبايا
من جديد رجعتلكم بس هالمرة مع الكبه ، هديك المرة كانت عن الملوخية وبتمنى من اللي جربو الطريقة يخبروني عن النتائج.
اليوم رح نحكي عن الكبه وأنا عملتها وفرزنتها لرمضان وكانت النتيجة يارب لك الحمد رائعة.
نبدأ بعد ما نقول بسم الله ما شاء الله. والتالي بعملك شي 40 حبة كبه.
أول إشي بتجيبي برغل مو ناعم مثل التبوله ( للتبوله برغل خاص لونه فاتح هيك عبياض وبكون كتير ناعم) في نوعين من البرغل يا إما أبيض يا إما أحمر وأنا هون اشتغلت بالأحمر نفس النتيجة بس بفضل أنا طعم الأحمر.
المقادير : نص كيلو برغل أحمر ، لحمة عجل هبره حمرا تقريبا 100 غرام مقطعه مكعبات . حبتين بطاطا ( وهون السر ) ملعقة صغيره قرفة ، ملعقة صغيرة بهارات كبه ، ملعقه صغيره بهارات مشكله، ملح ، بصله .
الطريقة : بتنقعي البرغل بمي فاتره او بارده عادي لمدة ربع ساعه أو عشر دقايق على حسب البرغل وانتي دوقيه ( ذوقي طعمه ) ورح تعرفي إذا صار لين يعني خلص أما إذا قاسي معناته لأ لساتو ما خلص.
وأثناء النقع بتسلقي حبتين بطاطا لما يستو منيح وبتهرسيهم . وهادا السر الله يسعدها وحده سورية حكتلي عنه الله يفتحها عليها يارب. لأنه كنت أحط دهنه وكانت زاكية ( طيبة ) بس كتير دسمة فبدي اشي يمسكها بس ما يكون دسم والحمد لله لقينا السر. وبصراحة كتير افضل من الدهن من ناحية انها بتمسك لأنه الدهن بده خبره ومعامله خاصه عشان ما تفرط بالقلي.
بعدين بصحن كبير بتحطي المكونات كلها البرغل والبطاطا والبصل المفروم والبهارات والملح وبتقلبيهم منيح وبتقسمي الكمية ثلاث أقسام .
بالفود بروسسر بتحطي الدفعه الأولى وبتطحنيها وأنا أضفت ربع بيالة مي عشان تتملس وتنطحن أحسن وممكن تضيفي بس لغاية نص بيالة.
وبتحطي العجين الناتج بالصحن وبتغلفيه وبتحطيه بالتلاجه .
أنا صراحة عملت الحشوة والعجين بالليل وحطيتهم بالتلاجة لتاني يوم عشان الجهد يخف.
هلأ الحشوة :
المقادير : نص كيلو لحمة ( أنا حطيت وقية عجل حمرا ووقية خروف بدهن عشان الطعم ) ، بصلتين كبار ، ملح ، فلفل ، بهارات كبه ، بهارات مشكله ، سماق ، صنوبر.
الطريقة : بتقلي الصنوبر وبترفعيه من الزيت وبتحتفظي بالزيت . بعدين بتحطي اللحمة على النار بدون زيت ولا إشي على نار هادية وحطي عليها ملعقة صغيرة فلفل أسود وبتخليها لما تنزل المي وأول ما تنزل المي تبعت اللحمة بتحطي البصل عشان يطبخ بمية اللحمة وشوفي الطعم ، لما يستوي البصل واللحمة وتنشف المي مزبوط بتحطي ملعقة أو تنتين من زيت قلي الصنوبر وبتقلبها لما تبدأ تتحمر بتحطي البهارات والملح وبتطفي النار . لما تبدأ تبرد بتحطي الصنوبر وما بتحركيه.
هون أنا حطيتها بالتلاجة لتاني يوم.
لما تيجي تبلشي شغل بتسخني الحشوة شويه وبتحطي السماق وبتقلبه بس لا تخلي السماق يطبخ.
والعجينة مهم تكون باردة عشان تتشكل أسرع لأنها لما تسخن بكون صعب التعامل معها …..
طريقة عمل ط§ظ„ظƒط¨ط© الآن……
طبعا فرشت لحالي وجهزت كل إشي بس أهم إشي كان كاسة الشاي ههههههه
جيبي العجينة واعمليها كرات بس اهم اشي تغطيها عشان ما تنشف
بعدين خدي كره
افتحي فيها بأصبعك فجوة
حطي الحشوة وشكليها
والحبة اللي بتخلصيها حطيها بالصينية وغطيها بالمشمع
الآن بتحطي عشرين حبه بالصينية وبتدخليها الفريزر عبين ما تخلصي العشرين التانية بكون جمدو وبتحطيهم بأكياس بس أهم اشي يجمدو قبل ما ينحطو بالأكياس عشان ما يلتلزقو ببعض.
الآن القلي …
بتحمي الزيت كتييييييييييييير بعدين بتحطي الكبه حبه حبة وممنوع التقليب بهالمرحلة
ولما يبدأ اللون شوي يتغير دغري بتهدي النار على الآخر
ولما تبلش تتحمر بتقلبيها شوي شوي على الهدا .
وهادي صورتها لما قدمتها
بسم الله ما شاء الله
شو رأيكم …….
وإلي بتجربها أمانة عليها تدعيلي
Hodvh hgw,v ,wgj td ;g adx uk hg;fm
بسويها وان شاء الله تضبط معي